gebn. Ma ist häichstns amal in nan Köihploderling neigloutscht, dånn hout ma kinna singa: „Du schöina, warme Köihdreek, wos bist den du sua gout." In Summa füa ran Brustfleck, in Winta füa ran Hout." Ogstoussena Zäihakapple houts a manchmal gebm, dös hout d Mutter schnell wieder gricht. Ausgwaschn, a Fleckl drümmgwicklt, zoubunda u weita is gonga. Owa gsund woar döi Rennerei u gout für die Puste. Benzingstänk woar nuch kanns, höichstns a wing Landluft hinta sua an Odlwogn u dös hout uns nix ausgmacht.

Unara Jugend heint is ja — wolln ma amal sogn — furtschrittlicher, vielleicht a gscheiter wöi miar dazamal. Unnütz Zeich habm miar ja a schu seinerzeit in de School lerne möihn, wos ma donn sei gänz Lebm nimmer braucht hout. Höichstns heint, wenn ma a Kreizwuarträtsl löisen will, dou mirkt ma, dass miar dåmals in de sogenanntn „Allgemein Büldind" eppas mäihera mitkröigt håbm. Ich maan dou Gschicht u a Geographie. Owa wos Motorn, elektrisch Zeich u wolln ma niat vagessen Raumschifffahrt u sünst dean neie Kram betrifft, dou san uns die Gunga üwa u miar Altn san Wasele. Dou möin mia Altn 's Mal haltn u Kinna nimma mit. Unna öitzricha Zeit überschlägt sich ja mit neien Erkenntnissen, neien Apparaten, Maschinen, Radio, Fernseh niat za vergessn, a Computer, Rechenmaschinen. Miar habm möin nuchs kleine u grousse Amalans van Schnöiarle runter aufsogn, u heint habm schu die Kinna döi klan elektrischn Rechndinger. Wöi sie alle haasn, was ich heint nuch niat. Ich rechn jedenfalls manchmal mit mein altn Kuapf schneller wöi döi Gunge mit ihrn Apparatglump.

Öitza owa gnouch va dean technischn Fuartschritt. Lausboubn gitts heint, u Lausboubn woarn a miar. Da Siart Polizei u da langa Bus habm manchn Ärcher mit uns ghatt. Owa sie habm uns kennt u wenn ma wos uagstellt habm, donn houts a daham donn die vadöintn Prügl gebm. Dös is ja öitza ogschafft, ich maan die Prüglstrouf. Wenn mia Boubm — die Madle woarn ja braver — wos uagstellt ghatt håbm u mei Mutter mit de Hundspeitsch — es hurcht sich ja gfahrlich ua, owa es woar nua a Röihpfäitschl mit a paar Lederröimele drua — kumma is; dou habm die Nachbarinnen gröift: „Hauens nua mein a mit" u donn san alle grennt; ich mit, owa hamgöih hob ich möin du u donn woar die Hundspeitsch schu wieda af ihrn Platz u ich ho halt a Stroufpredich kröigt. Kinnamisshandlungen, wöi mas heint oft in Zeitingen lest u a im Rundfunk höiart, dös houts ba uns daham niat gebm. Die Leit woarn zwoar arm gechen heint, owa es hout fast Jeder sei eichens Häisl u manchera a nuch a Feld ghatt, manchmal a nuch a Kouh im Stool — dös woarn dann die: „Köihpritscher"; iarmara Leit habm sich a Ziech ghaltn wegn de Mülch, u vüll davua hobm sich an Groshau in Wald va da Gemeinde pacht u habm dös Foutta am Buckl hamtrogn. Valangts dös heint amal va öimatz! Dou gänga die Frauen — Weiwa därm ma ja nimma sogn — aff die Arwat, nua dass sie sich a Auto leistn kinna u die Kinna daham san ohne Mutter. Ob dös gout is???

Heint bin ich schu amål im Schwafeln drinna u ös werds sogn, da Albin redt her, als wenn er schu etliche Halwa hinta die Bindn gossn häit. Owa leider ho ich dou ba uns kan Böiatisch, wou ma sua wöi daham awing schlaggewalerisch plauschn kann,t. Wenn ich glei zan Richard hinta prassl mit mein Droutiasl — es is ja allewal a gouta Kilometer — üawarn Tooch is de gouta Richard in da Arwet u wenn er abnds hamkinnt, dann hout er mit sein groussn Gartn za tou. Da Petrus streikt u wenn ma unna uapflanzt Zeich durchbringa wolln, donn möin ma „sprenga", dou sogn sa ja göissn. Da Mai, dea kinnt mit ara Hitzwell, amål houts a wengl grängt, owa dös woar für die Katz, da Buadn is wöi Asche u dou soll ma nuch wos neisaatn. Meine Erdäppl hob ich gesteckt, sie kumma schu langsam. Dou hob ich du in da Zeiting glesen — wenn ma grod oina dawischt — Streik füar wos? Höicheran Louhn oder mäija Dividende? Dös nua nebenbei. In Belgien habm sie de gstecktn Erdäppl wieder ausgrobm u am Schwarzmarkt teia vakaaft — 40 Hektar Land uapflanzte Erdäppl. Ma mou nua mitn Kuapf schüttln. Ba uns daham woar ja a a Feldwach organisiert owa niat ban Steckn, sondern ba da Ernte. U dou woarn fei hungriche Zeitn mit Lebensmittlkoartn usw. Owa dass ma die frischglegtn Erdäppl ausgrobm hout, dös is wirklich gonz nei.

Döi Zeitn wearn langsam unheimlich. Wos gitts denn nuar für Banküberfälle. Mei Vatter hout sich fei nuch füar die Sparkass es Geld va Karlsbod ghult u wal er niat