Wöis daham woar

Fröling is, wenigstns an Kulänna nouch. Die Bäima håbms a denkt u håbm fei schwar schöi blöiht owa dear narrischa April mit sein Nåchtfröstn houts wieda amål fettich brächt, daß döi vuawitziche Blöih ogfrouern is u öitza siaht ma nix wöi braune Kerschtnbäima u a nuch vüll onarscht haut möin drua glaubn. Hoffentlich måchn die Eismanner niat nuch s onara kaput. Ba uns daham hout sich hålt die Natur a awing mäia Zeit glout. Ka Wunna, mia dou in Kahl am Main håbm 100 m Seehöhe u Schlaggewål woar 600 m houch glegn, dös is schu a Unterschied, dafür woar a die Luft besser.

Öitza bin ich schu 30 Gauja dou drassn u ållewal zöiht ma nuch Vergleiche mit daham. Sua is mas a am 1. Mai gonga. Dou bin ich ba ran Kinnaspülplatz vabaikumma u ua wos hob ich denkt: „U unnarn Röijaplätz in da Seifartsgröi". Aff dean werds enk ja nuch ålle darinnern kinna. Dou håbm sie füa unnara åltn Wasserleitingen die Holzröijarn buhrt u es woarn sua ra 20 bis 30 Baumstamm (Köifüarl) duatt glegn. Zan Buahrn habm sie nuch a Gschtell baut ghått as zwa Längsbålkn, zwa Querbålkn u wou döi üwaranonna gonga san woarn nuch vöia Pfostn in d Höich gstondn, dass ma hout döi Bäima zan buahrn neilegen kinna. Dös woar natürlich wos füa uns Kinna, Boubm u Madle. As de Rindn håbm ma Schiffla gschnitzt u döi håbm ma aff dean Teichlan in unnarn Seifertsgröina Bachla schwimma loua. Aff dean Bäiman u dean Buahrgschtell håbm ma za Nouchlaffeles tou. Owa mia håbm a in dös Gschtell schöina, glåtta Bäima neigmarrt; sie woarn ja füar uns Boubm schwar, dös hout uns fei nix ausgmacht. Mit vereintn Kräften habm miar sie schu in döi Böck neibracht u donn håbm ma die schönsta Schaukel ghått. Gearn håbm ma a dean Röiabuhran zogschaut. Döi habm sua groussa, långe Buhra ghatt, sua ebba drei Meter wearns lang u vuarn die Spitz kennt 10 cm dick gwest sei. Donn habm sie nuch a Querholz ghått, dös hout genau zwischn döi zwa Längsbalkn neipåsst u hout in da Mitt an Einschnitt ghått, dass de Buhra schöi fest drinna glegn is. Döi Monna håbm fei månchmal wöi long rümgricht bis döi Spitz van Buhra genau im Kern van Baum gsessen is. Za dean Dingan wos sie rausbuhrt håbm, habm mia Guckern gsägt u wöi gern häitn mia döi hamtrogn, denn döi håbm fei schwa gout brennt. Owa dean Monnarn ihre Weiwa san mit Bucklkürbn essntrogn kumma u håbm döi Dinga mitgnumma. Dös Buhrn woar fei a kaa leichte Arwet. Döi Buhra san årch schwaar gonga. Döi Stamm san va zwa Seitn uabuhrt wurdn u in da Mitt habm sie möin genau z'såmmtreffn, dafüar håbm sie schu im Wald schöine, grode u ostfreie Baumstämm ausgsoucht. Owa dös Wasser as dean Holzröiarn woar gout, dou woar kaa Rost drinna u hout bessa gschmeckt als dös hiesige Mineralwåsser. Unarn Seifertsgröina Wasser hout ma nouchgsagt, dass es gout für die Augn is, a dös asn Bachla. Es woar ja Stollnwasser u dass es radiumhältlich woar, hout sich ja nouch'n Kröich bewiesn, wöi die Russn an gonzn Höichberch unterwöllt håbm nouch dean kostbarn Uran. Öitza kinnt herich stått dean glöckerlhelln Wasser nua mäiha a braune Bröih. As dean kannt der Kirchner kaa Böia mäja bräja.

Öitza bin ich wieder amal va Hunz aff Dunz kumma. Da Röhjaplatz, dös war füa uns Seifertsgrüane da schänste Kinnaspülplatz, der hout der Stadt kan Kreizer Geld kost.

Mia warn hålt damals a niat sua uanspruchsvoll wöi heintzatooch. Wear hout seinerzeit suawos wöi an „Trimm dich Pfad" kennt. Mia habm „Grafelt". A ålte Fossraaf oder a leichta Wognraf u a urdentliche Prügel dazou, dös houts fei a tou. Mit dean Prügel habm ma aff dean Raaf neidengelt, dass er grennt is u miar san danebenher gwetzt u habm dean Raaf allewal mäja uatriebn. Unara Rennstreckn håbm sich fei kinna schaue louja, döi woarn niat unbegrenzt. Die Seifertsgröi nunter, die Donner nauf, ban Heineck hinter, ua da Seffa (die Feierest van Elektrizitätswerk Rossmeisl) vabei bis nauf aff die üawara Gåss, d'Strouss wieder runter u üwan Målzmüllerdåmm ham. Wou Pflaster woar, duatt san me ja niat hin, döi Katzeköpp woarn kaa Asphalt u dou san döi Raaf zavüll ghuppt u a leicht kaputtgonga. Es woarn ja meistns nua alte, verroste Blechdinga, döi ma gfunna håbm. Wer häit uns schu wos Neis gebm, für uns woars alte a nuch gout genouch. Wettrenne habma dou gmacht. Aufpassn affn Verkehr, wöi heintzatooch, hout ma ja niat brauchn. Autos houts nuch fast kaane