Wöis daham woar

von Albin Steinwasser

Va unnan schöin Schlaggewal wüll ich enk heint niat vül dazühln. Ehrlich gsågt, mia föllt a grod nix ei(n). Owa unna Vetta Brummeissl läßt ma ka Rouh u benzt ållewal ua mia, daß ich wieda amål wos schreibn soll. Wisst's ich hob miars fei hi(n) u her üwalegt, ob ich döi Üwaschrift ändern soll oda niat u bi(n) donn du za dean Entschluß kumma, daß mas sua Ioua. Mia dischkeriern a wing schöi schlaggewålerisch, donn fühln mia uns alle wieda wöi daham u sua månchn wiard ba dean Dischkursch allehånd va daham wieda ei(n)falln.

Vuarches Goua im Mai woar ich in Urlaub am Attersee im Salzkammergut u mit dean Leitn duatt hob ich hålt kinna fei genau sua riadn wöi ba uns daham, u's Essn woa a sua, wöi mias gwiahnt san. Suagoua mit'n Pfarra ho(b) ich mich eghalandrisch untahåltn. Våwa a niat? Wouds hinkummts, üwerall riadn sa in ihrer Mundårt. An Sachsn, an Köllner, an Berliner u nuch vül onara häiart ma schu malenweit raus. Ich hurch jedn Tooch åbnds v hålwa siewena an Münchner Sender, dou singa a öfter döi as de Owerpfålz. Wenn ma dou sua zouhurcht, maant ma grod ma wa(r) im Eghalånd. Dös is du vül schänna als wöi döi neimodischn „Hits". Bis öitza hout ma a nuch kan deitschn Ausdruck füa dean Krach gfunna. Englisch möins sa singa u ich bild ma fei ei, daß sie selwa nit vastänga wos sie dou plärrn. Weit håbm mas fei bråcht. Deitsche Språch, schwere Språch! Wos ma heintzatooch mit Fremdwüartern ümheit, dös gäiht schu aff ka Kouhaut mäia. Lest's amål sua a Reklame va ran Kaufhaus, wos döi åls uaböitn: „Herren-Jeans, Blouson-Jacken, Acryl-Plaids, Herren-Gaban, Jeans-Look-Kinderstiefel, Cord-Jeans, Boots". U wos unara sogenannten Volksvertreter mit Fremdwüartern rümschmeißn, dou kennt an månchmal da Krogn plåtzn. Owa dös is a månchmal mit Absicht, wal sua a Fremdwuart, dös kua ma auslegn wöi mas grod braucht. Schauts nua amål in sua ran Fremdwüarterböichla nouch. Fröja houts amål ghaßn: „Die Deutschen sind das Volk der Dichter und Denker" u a unara Kultur hout die gonza Welt bereichert, u hei(n)t? Dou nimmt unna Kulturvolk Sittn u Bräuch va Völkern ua, va deanan 90 Prozent niat lesn u schreibm kinna. Wenn mia Eaghalanda owa in unara Tracht auftretn u unara åltn Sittn u Bräich houchhåltn, donn wiad drüwa gspöttelt. Dou haßt's mia san rückständich. Heimattreffen, Sudetendeutscher Tag, dös paßt deanan goua niat. Dou san mia Revanchisten, Nazi usw. Va mia aus kinna döi Neimalgscheitn sogn wos sie wolln, döi Hadalumpn, döi uns am löibstn gonz våkaffn tätn. Daß mia(r) nimma hamkumma, dös wissn mia(r) alle, sua gscheit san mia(r) schu long u dou brauchn ma döi Malaffn was Gott wouha niat dazou. Owa unna Schlaggewalerisch, dös loun mia uns niat nemma. Mia dischkeriern weiter sua wöi daham, wöi uns da Schnobl gwåchsn is. Die onarn touns ja a u san ma amål gonz ehrlich, as reinste „Hochdeutsch" is in Prach gredt wuardn. Ka Wunna, im Gaua 1348 is duat unte(r) Karl den IV. von Luxemburg die erste deitsche Universität gründt wuarn. Dös woarn hålt nuch Zeitn, dou houts schu amål a „Vereinigtes Europa" gebn — allerdings houts damals „Heiliges römisches Reich deutscher Nation" ghasn. Owa dös grouße Reich hout dearn onarn niat paßt u sua hout mas zaschlogn. Heintzatooch war ma frouch, wenn ma endlich dös „Vereinte Europa" wieda häit. Sua ändern sich hålt die Zeiten. Es warn fei heint bestimmt vüla, vüla frouch, wenn Böhmen nuch ba Österreich wa(r). Hauptsächlich döi wos Österreich nit schnell gnouch håbn auftaln kinna. Gölla ich ho recht?

Öitza owa Schluß mit dean Böiaschwefel. Ich ho(b) a paar schöina Versla gfunna u döi wüll ich enk aufschreibn. Sie san niat va mia.