Wöis daham woar

Oh du löiwa Fosnat, kinnst denn du schu wieda;
Fearn håbm ma Krüa grobm, heija grobm ma wieda.
Holloho, holloho, hintn hängt die Fasching no.

Ich ho(b) ålle Sender oghurcht u alle Karnevalszüch im Fernseh uagschaut, owa una Schlåggewåla Nationalhymne ho(b) ich fei nirchetz ghäiart. Döi Maschkerazüch mit dean vülln Ölscheichs u a die onarn Dinga üwa Ümweltschutz wårn ja niat schleecht. A die Politiker håbm sie gånz schöi durchn Kakau zuagn. Döi Tschumpaliedla habm ma a gout gfålln, owa dös gonza Zeich hout mich a wing nouchdenklich gstimmt.

Ob ma wüll ode(r) niat, is ma in Gedånkn daham in Schlåggewål. A ba uns san Scheich mit an groussn Harem als Kurgäst auftret(n). Owa uas Öl hout dou nuch nöimatz denkt. Mia håbm ja unara schöin Kachlöafn ghått. In döi haut ma kinna åls neischiern u die Stubn woar schöi wårm. Wöi schöi woar dös, wenn ma van Ruschln ausgfrouarn hamkumma is u ma hout sich am Uafnbankla schöi auswürma u sei nåß Zeich trückna kinna. Ja nix üwa sua an åltn, goutn Kachluafn. In jedran woar a Hofn einbaut u meistens hout er nuch zwa Röiarn ghått, in deanan hout ma åls båchn kinna suagoua Båchena-Kniadla. Wal sie gmauert woarn, habm sie a long die Wüarm ghåltn, niat wöi die öitzrichn Blechkastn, döi glei kålt san wenns Feia ausgäiht.

Ja mei, Zentralheizing is ja a gonz schöi, nua kinna sich sa niat ålle Leit leistn. Za da Ümweltverschmutzung, ua suawos håbm ma fröia a niat Denkt. Wul habm månche Misthaufn u wenn Odl ausgfåhrn is a niat gout grochn. Ma hout hålt a wing die Nos zuagn u gsågt: „Låndluft". Dös hout ma åls selbstverständlich hi(n)gnumma u dös bissl Mist wos ban Mistfåhrn runter gfålln is, dös hout a kan Menschn gstöiart.

Jednfålls krank wuardn is nöimatz davua. Is ma in Wåld spaziern gonga, hout ma nix gseah wos niat zan Wåld ghäiart häit. U heint, Verpåckungsmaterial, ålte Fåhrradle u Auto, ja suagaua Einrichtungsgegenständ våschandeln die Gechnd. Ma nennt dös „Wohlststandsmüll". U gaua s Wåsser. Bal(d) wiard ma nimma wissen, wou mas Trinkwåsser he(r)nimmt. Vasouchts amål im Main, Rhein oder an onarn Flüssle za bo(d)n. Sauve(r) getts nei u drecked kummts raus. Wöi schöi sauwe(r) woarn dou unara Bachle u Teich, dou hout ma kinna draus trinkn. Owa öitza Schluss mit dean Böiatischdischkursch. Es is heint Aschemitmich u grod les ich in dean Böichla „Abriß der Geschichte der alten, einst kaiserlich freien Bergstadt Schlaggenwald", zusammengestellt von unserem Bürgerschuldirektor Rudolf Prosch, daß sie a ba uns daham schu fröia habm Fosnat feiern kinna. Ich wüll enk dös amål oschreibn: Der Rat feierte selber sehr gerne eine fröhliche Fasnacht. Man erwartete zur Fasnacht 1542 den edlen Herrn Kaspar Pflug als Gast und stellte folgende Ordnung auf:

Fasnachtszettel

Verzeichnis der Personen: Hans Beer, Bürgermeister, Heinrich Wintweber, Bartel Trötscher, Peter Notz, Nickel Pfeffer, Paul Richter und noch sechs Ratsherren. Ferner: Pfarrer Mates Fischer, Spitalpfarrer Gregor Pfannkuch, Hans Portner aufm Kugelhof, Hanns Niedermann, Hans Elbogner vom Unteren Schönfeld, Hans Zerer von Rambsental, Sebastian Huzelmann vom Wolfshof, Georg Mulz von Waldau als Zehender, Georg Kestel Bergmeister, zwei Berggeschworene, Doktor, Schulmeister, Umgelder und etwa 20 andere Herrn. Bei Tisch hatten Dienst zu tun: Hans Trötscher, Seb. Niedermann, Balzer, Valtin und Kaspar Mulz, Endres Olhans u. a. Für den Trunk hatten zu sorgen: Albert Simon, Heinrich Wihan, Hans Hammerschmid.

**