Kinnan siah[r] i nuch wöi haint, 's war'n zan Glück hüsch grauß Zwieslerdäpfl, u i häias nuch allawal, wöi affa unter dean Kinnan da Handl vaganga is, wöi die graußn an kloinern va dean zwäi Erdäpfeln üm [r]a Peitsch'n-schnöierl owa sinst wos vin oghandlt hobm. Ich ho da-siba allahand Leutn scho essn zougschaut, owa sua gout hauts nuch koinan gschmeckt als wöi dean Häuslweba-kinnan. Ba mein Leutn hauts in Winta zan Erdäpfln dau u don nuch a Schräibl g'räukerts Fleisch gebm u recht viil Tunk dazou, dös war a Herrnessn, dau häitn b' Häusl-webakinna gaua neat zouseah kinna.

D' Kümmlerdäpfl san ah gout, wenn sie recht mehlbi san u wenn recht viil asglauana Butta drüwa gschütt wiad. Ich koas heuntichstochs nuch schöia gaua neat dawartn, wenn i in Summa hoim kumm bis döi Fröih-erdäpfl zeiti san, alltogh wiad a Stuak aszuagn u prowiert, wo ma neat scho Kümmlerdäpfl mach'n kannt. Hauts denn amal scho üm döi Zeit sua[r] a Erdäpflfeld vagseah? Dau stenga sie dau, va Stuak nebn onan, beetweis in oiner Reih asgricht wöi b' Hüafana Vetrana u wenn sie gaua nuch blöiha u mit dean schäin weißn u röithlinga Sternlan sua freundli af dös buschicha gräina Kräutera u döia Bambala broa öjaknappn, dau howi scho oft denkt: dös san gwiß unan Herrgottn seina Blaumastöckla u sua lang döi gräin san u blöiha, haut er alltogh sein Frumleich-mastogh. Dös san döi schäin blaubm Jakobierdäpfl — die onan wer'n äiascht viil spata: wenn üm b' Kirwa üm b' Wintasat einbracht is, affa gäihts ah üwa döi oa. Gräins Kräutara hobm döi affa frali koi's mehja, dös is bis af a par Bizala alls zsammdurrt u liegt wöi a wena dürra Towak af dean Vettan. Die kloin Leut mit ihrn par Vettlan Erdäpfl san bal förti mit'n asgrobm, kurza Haua san bal bürscht — owa da Baua, wenn er halbm-wegh a par Köihhäutla u a Oechsl in Stol stäih haut, der haut a ghöricha Arwat. Wenn er ah nuch Kraut u Roubm u Tuaschn haut fürs Vöich, d' Erdäpfl san duh 's mäißt, wos ea braucht. Dafüa haut ea ah a hüsch grauß Trumm Feld mit Erdäpfln vabaut, u wenns Erdäpfl-grobm vagäiht, dau ruckt er mit sein gonzn Leutn as u hinawieda mou nu a Häuslwei owa[r] a Toghlöihneri asn Durf