Wöis daham woar

Im letzarn Heimatbröif is ja vüll üwa unna Treffn in Auerbach gschriebn wuarn, owa ich mou halt du nuch mein Senf dazougebm. Woars dou niat schöi? Meina Schätzing nouch woarn ja ebba 400 Mannl u Weiwla, Gung u Alt duat. Üwa döi vülln Gunga hob ich mich am meistn gfraat, wal ma gseah hout, daß a döi nuch u unnarn altn Hoamatstadl Schlåggewald hänge. Döi schöin Aufnahmen werdn vülln bestimmt a schöina Erinnerung sei, wer waas wenn mia wieda amal sua schöi basåmm sei kinna. U döi herzlicha Begröißerei, ma häit kinna månchmal fouttaneidisch werdn.

Vüll habm sich ja schu äiwich niat gseah, manchera seit de Vertreibung. Dou woar oft a Routerei: „Wer bist denn Du, Dich möißt ich ja kenna?!" Owa sua gäihts an, ma kennts Gsicht owa ma waas nimma wouhin damit. Die Goua san halt a niat spurlos ua an vabeigonga, älter san ma alle wuarn. Die an san schmäler u die onnarn moppelicher u die Houa san meistns a üaslgrau wuarn, owa ihrn altn Humor habm die meistn behaltn, dös siaht man am besten oh unan Hofmann Toni, dös is heint nuch da alte Fianza wöi er am Routhaus woar. Toni nix füa ungout, sua bist schu recht; tou nuch recht vüll Goua weita sua zou, a Hetz mou sei(n. Gella!!??

Wenn man sua rümhäiart h'abms fei die Meistn wieda za woos bracht, wenns a aff da Wassersuppn rausgschwumma san u die Bachenakniadla za End woarn. Unna Schlåggewala Schloch läßt sich halt du niat sua leicht untakröign. Antnsoos bleibt Antnsoos u Baasocker bleibm Baasocker, aff „Schulzidackl" hurchn sie nuch alle.

Unnara Gunga måchns ihrn Altn nouch, döi setzn sich durch u loun sich niat untakröign. Gfraat houts mich, daß vüll va dea Gungan sich amål in ihrer Voterstoodt umgschaut habm. Vül wearn ja ihr Geburtshaus nimma gfunna habm, owa es stäiht nuch allewal da Glocketurm, die zwa Kirchn u an Gaalingsberch, Krudum, Spitzberch, die Haad habm sie fei a nuch niat wegmåchn kinna. Ich täit ja selwa gearn amal neifahrn, owa ehrlich gsågt, miar täts Herz wäih, wenn ich mei Vatterhaus u nuch sua vüll onnarsch nimma finna tät. Es fahlt fei schu vül, da Alte Markt, a Taal van Markt, die gonzn Seit ua da Flout van Schlåchthuaf bis nauf zan Roßmeißl, die Malzmühl u's Braahaus u nuch vül onnarsch, suagoua an Dürfl Rasierer sei Haus am Mark, dös unta Denkmalschutz gstondn is u mit sein dickn Staamauern bestimmt va selwa niat eigfalln waar. Unna gouts Seifartsgröina Wasser is a fuat, dou laft herich nua mäia a brauna Bröi, suagoua an Kirschna Brunna habms zougschütt.

Eichentlich ho ich ja wolln dös Treffen benutzn u ba dera Gelegenheit ålte Schlåggewale Ausdrück u Redenarten (Sprüchla) såmmeln. Ich ho ma fei schu Zettl vuarbereit ghatt, owa es woar ja Såmstich im Löivn u Sunntich im Pfarrsaal voll wöi in a ran Mölwürmatoupf u ba dean Trosch hout ma ja s eichena Wuart nimma vastondn.

Sua hob ich mir halt denkt: „Albin, lous göih, ba dean Durchanonna houts ja sua kan Zweck. Deine Schlaggewala kumma nua alle haaliche Zeit amål zsamm, wolln sich begröißn, Neiichkeitn dazühln u sünst wos tråtschn, dou habm sie für dich ka Zeit."

Sua gie(b ich heint amal mei volle Adress ua, denkts awing üwa unna Schlaggewal nouch u döi Sprüch wod's daham gmåcht håtts. Fangts ua fröih ban Aufstöih, je nachdem obts gout oda schlecht gschloufn, vielleicht a an Koter ghått håts u da Schädl wöi a Trenkschaffl woar. Wos håtts dou ös Manner u diaz Weiwa gsagt u sua weita bis aff d Nacht. Bsuch is kumma, aff an hout ma schu long gwart u an onan heit ma löiwa va hintn gseah. Za Fasching, Kirwa, Gauamarkt, Anneresnabnd, Weihnachtn, Neigoua, Oustern, Houchzeitn, Taf, Nåmestäch. Wos is dou gredt wuarn u wos hout ma sich gwunschn. Wos hout s Wei gsagt, wenn de Mua amal nimma gonz nöichtern asn Wirtshaus kumma is.

Böiatisch-Gschichtla u Kaffeeklatsch. Dös san lauter sua Dinga, wou ma oft herzhaft drüwa låchn kua. A döi Löibsbeteierungen ban Freigöih, Schmusn, Fitschln,