D Fieschbröih

D Schäi(n)fella Döibsfinga håbm amål
drunta in Üametteich gfischt,
owa da Wachta va Schlåggåwal(d)
hout sie ban Kråpsn dawischt.

Wöi sich da Wachta dahoust u daschimpft,
habm döi va Schäi(n)fell nuh glåcht,
d arathålbm is ear af Schäi(n)fell ei(n)
u håut an Vuarstäiha bråcht.

Dear håut vanäih wö a Satan gfloucht:
„Mitbürgha, måchts ma koa(n) Schånd!"
Zletzt owa håut ear an Döibskråmpf kröigt,
påscht an schäin Hecht in sa(n) Gwåndt.

Grod owa kinnt a Schandarm dazou,
schlöisst sie u föihat sie a(n),
Z Piatscha drunt, in aran Louch, am Gricht,
gammarn u böissn sie schwa(r).

Zletzt wöi da Richta sa(n) Urteil spricht,
flennt sua-r a gunga Falott:
„'s Anspirrn, dees san ma va fröiha gwüahnt,
owa-r üm d Fieschbröih is schod."

Josef Hofmann

Wöis daham woar

Döi Üwaschrift paßt eigentlich nimma gånz, wou soll ma all döi Gschichtla va daham nuch hernemma; gouja wenn ma sua alaa(n) dousitzt. Ja, wenn ma sua an Böiatisch häit u sua a paar alte Schlaggewåla Picha drüm rüm, dou kennt ja nuch sua månches Episödchen uas Tågeslöicht kumma.

Ja, ba unarn Treffn in Goldbach, dou häit ma kinna wos raushuln, wenn nua gnouch Zeit gwest wa(r). Ma is ja niat rümkumma. Üwerall bekånnte Gsichta, månchera hout ma schu dreißich Gåuja u nuch länga niat gseah. Die Gsichta san an bekånnt vüakumma, owa ma hout ban bestn Wülln niat gwißt, wou ma sa hi(n)tout. Ban Möi(d)lan woars am lößtn, döi håbm ghaiart ohne unaran za fröign u må hout fei oft niat gwißt, wöi sie heint haßn. Mia is wenigstens sua gonga u månchn va enk bestimmt a. Owa schöi woars.

Sua månchera håbm ma gsågt, daß nan mei Gschreibsl gföllt, wenn sie a månchmal a wing buchstabiern u nouchspikaliern möin. Mia selwa gäihts ja ban Schreibm a niat vül bessa. Owa ich siah niat ein, våwa die Bayern, die Schwåbm, die Rheinländer u all döi onarn in ihrn Dialekt riadn därfn u mia solln una schöins Schlåggewålerisch eppa vagessn. Na, dös toutn mia fei niat, mia dischkariern weite(r), wöi uns da Schnobl gwåchsn is. Una Hergott hout uns als Eghalanda aff d'Welt kumma loua u dös wolln ma a bleibm. Daß mia a Språchinsel im Eghalånd woarn, dös is durch die zougroastn Berchleit kumma u in Ober- u Mittelfrankn kinna ma riadn wöi daham. Dös hout fei mit de(r) Vatreibung oder de(r) sogenånntn Eingliederung gouja nix za tou.