Oft haut mi owa der Kreuza g'reut u i ho löiba 's truckna Braut gessn u dafü[r] döi Kreuza z'sammgspart: Döi z'sammgspartn Kreuza howi amal z'Weihnachtn recht gout brauchn kinna.

's wa[r] amal grod sua[r] a lausa Zeit. Da Vatta haut schlecht baut, 's Träu u d'Erdäpfl wa[r]n halmi weggfräiat u halmi asbrennt, u d'Mutta haut van Köihan nex ghatt, wal sie grod hauch trogn hobm; sua hobma möin allaz'samm u paar Monat lang va da Ziegh lebm. Dau haut d'Mutta gsagt: „Kinna heua[r] is fein nex mit'n Christkindla u mit'n Zuckabam, i wüßt gaua neat, wau is hernehmat, u mit dean olbern Pfeffareitern u dean Zuckazeugh verdörbats enk sua nea[r] on Mogn!"

Meina kloin G'schwistarat hobm nauch dera Riad recht olwa dra[n]gseah u jedas haut affa in aran Winkl wau a weng greint in da Stüll, owa[r] ich ho glei van döi siebenazwanzigh Kreuza denkt, wos i sua[r] döi Birn z'mittogh daspart ghatt ho. Gsagt howi nex, owa denkt howi: „Dös wa duh neat schlecht, wenn ma üm siebenazwanzigh Kreuza neat an rechtn schäin Zuckabam kröichat." Am anan Togh howi glei am Buadn dös weng Zeugh z'sammgsoucht, wos ma nuch van fertinga Zuckabam afghuabm ghatt hobm. Ich häit schöia guchzn müign, wöi döi schäin rautn u blaum Kirzlstümpala gsuna ho Wöi gout wa[r]s, daß d'Mutta zan voringa halinga Abnd gsagt ghat haut: „Kinna, gets ma fein acht af döi Löichtla am Zuckabam, daß koa Feua askinnt in unan hülzan Haus! Heunt hobm sie scho lang sot brennt, öitza kinnts sie scho wieda aslöschn, hauts dafiia a anasmal a nuch wos!" U sua son schöia die holbm Kirzla überla[r] bliebm. In da Stodt howi affa üimaran Kreuza klaina Aepfala, üimaran Kreuza Nuß' u üm zwäi[n] Kreuza a Böicherl Goldpapier u a Böicherl Silbapapier fiiar d'Nuß' kaft, u dau howi z'mittogh in da Schöll a reina Bagolderei va[n]gricht. Spata howi nuch ban Pfeffaköichla Zuckazeugh kaft, schäina gel[b] u rauth va[n]strichana Stückla, dra üimaran Kreuza haut ma da[r] gouta Mürling gebm, u sua is ma dös Schuack, wos i kaft ho, grod af zwanzigh Kreuza kumma, u ich ho va mein siebenazwanzigh Kreuzern nuch allawal drei überla[r] ghatt.