Zan Erdäpflgrobm.

Allawal üm d’ Kirwa üm häiat ma z’ Wean dau ner wöi van Weintraubm riabn: da’n sie heuer gaua sua gout grauthn san, wos dös für an Most u an Heuringa gebm wiad, u sua zou. Dös vadröißt oin fein oft grob, u dau hob i mir denkt: wos genga uns döi olwern Weintraubm oa, una Weintraubm san d’Erdäpfl u za da Kirwa san döi ah zeiti. Wer’s neat gsäah haut, wos dös bar uns draß in da Hoimat für a Wirtschaft is, wenn’s Erdäpflgrobm vagäiht, dean will i’s öitza dazühln u wer selber daba war ban Erdäpflgrobm, der wird ma recht gebm.

Geld hobm d’Leut ba uns dahoim gaua koins wehja, dös haut ihnan alls da Gud u ’s Steueramt ognumma, owa Erdäpfl haut nuch jedichs arms Häuslwei, wenn’s halbenwegch a weng Mist fürn Bauer zan asföihern haut, u döi san oft grob sua grauß u schäin wöi d’ Bauern-erdäpfl selber. Koa rah gaua neat onascht san: Wenn die arma Leut koi Erdäpfl mehja häi’n in Winta za da Wassajuppn, assa möißtn’s rein Bamrindn owa Stoakuhln zoubeißn, u döi wa’n ah nuch z’theua. Wenn i droa denk, wos dös für a feins Essn is, wenn z’nachts sua[r] a rauchata Tuapf voller kocht’ Erdäpfl ins Mölterl ein-g’la[r]t u am Tisch hingstellt wiad, wöi der Brodn sua dahäich steigt, daß a wal oins s’ana neat siaht ban Tisch — wöi assa jedas sein Schnappa owa an Löfflstiil nimmt u oin Erdäpfl nau’n onan oschüalt, wenn’s ah[r] a weng in d’Finga brenna, u wenn af döi schäin gelbm mehlbinga Viiachala a Bräisl Solz u hintenau gaua a Plätzl Butta draf kinnt: lafft Enk dau neat ’s Wassa in Mal z’samm va latta Glust? —

Una Nachba dahoim war da Häuslweba mit [r]an krankn Wei u a Stubm volla Kinnan. Dau bin i z’nachts öjamal a weng hutzn üwi gschlichn nau’n Antreibm. Amal war i ah wieda don u dau hoam sie grod gessn: zinnhella Wassasuppn as da graußn Schüss! u a kloin’s Schüsseal volla Erdäpfl. Er mit acht Kinnan is ban Tisch gsessn u ’s Wei is in Bett g’leg’n; u dau haut assa da Häusl-weba d’ Erdäpfl asthalt: af jedas san z’wäi Erdäpfl kumma ’s Wei haut koi g’mögt. Dean Appatit va dean