sie tret'n ain sua r allawal af d' Föiß." Deitza, mi' hobm s' a af d' Föiß u mia[r] scheint, a am Mog'n u am Knapf affitret'n g'hatt, u schlecht waa[r] ma grob aa[n] — owa haimgäih[n] how i wölln denna nuh niat. „Gäih, Karel, nea[r] nuh a weng bleibm ma dau, 's war ja a Schand, wenn ma öitza scho[n] wieda haimgängat'n, san ma[r] ja äiascht kumma. Gäih, siah hea[r], dau haust dean Kouch'n, setz' bi' a weng do'n af's Musikant'nbäierl affi in 's Eck ei[n], dau tritt bi' nemats af d' Zäiha, i tanz nea[r] nuh an Raia, affa gemma glei' haim, gelza Karel? U da arm' Bou is richti don affi u haut die ganz Nacht mit halbm Aughan zoug'schaut, wöi i affa wieda aa[n]g'fanga ho zan tanz'n u flatt'n; u aßta länga daß 's ganga is, aßta bessa how is künnt. Nea[r] öiamal, wenn sie grob füa[r] d' Musikant'n o-g'sammelt hobm, is ma wieda wöi a weng niat gout g'woad'n, u dau bin i allamal g'schwind a weng affiganga aa[n] d' Luft, bis 's wieda vabei waa[r] — d' Schlechtighkeit.

Gegha Fröih haut affa da Friedlgirgh zan Raffn aa[n]g'fanga, dau how i mi' affa zuag'n. Af dös waa[r] i denna nuh niat a[n]g'richt, u 's waa[r] a recht gout, denn dau haut's Fetz'n gebm, u heunt nuh kenn' i a paa[r], döi va dera Kirwa u van Friedlgirgh an Tapp'n davaa[n]trog'n hobm. 's waa[r] scho[n] schöia Togh, wöi i mit mein Karala haim kumma bin. Dean Boubm haut g'frauan wöi an gunga Hund, u greint haut a am ganz'n Wegh zan Leutdabarma: „Wa ma nea[r] haimganga, wöi da niat gout waa[r], öitza wea[r]n ma van Voda recht Prüg'l kröig'n, u i kaa[n] neks dafüa[r]." „Sa halt duh nea[r] z'Mal, olwara Bou!" sogh i, „weckst ja alls af, mia[r] sog'n, daß ma scho[n] uma Alfa haimkumma san. Deitza zöig'n ma na g'schwind d' Stiefl as, daß ma kain Lärma mach'n! U sua san ma holt ei[n]g'schlich'n wöi d' Häihnadöibm. G'schlaufm hobm ma affa wöi daschlog'n. Owa wöi ma munta g'woad'n san, dau is da Kirwatanz nuh amal vn vorn aa[n]ganga, u da Voda haut dazou afg'spielt. Dös waa[r] a lausa Kirwamaunta — mäihara sogh i niat. Owa wöi i nauch a ra paa[r] Toghan wieda za mia[r] kumma bin u alls nuh amal üwalegt ho, how i denkt u denk 's heunt nuh: Dös, wos danauch kumma is, waa[r] laus, owa d' Kirwa waa[r] duh schäi[n]!