Da Zoawöih! / Woos zan Låchn

Da Zoawöih!

Wea schöina Zäah hout leicht låchn
wal ma Stoodt kua mit ihnen måchen,
ma kua a s Mal recht weit af reißn
vül weita nu ols wöi de Preißn,
denn dou siaht jedera döi Pracht,
ebn wenn ma s Mal af mocht u locht.

Owa wöi als vergänglich is af Erdn
könna döi Krüppl schlecht a wern,
u wenn se oafonga zan murmeln,
daß ma min Fingern ei kennt burln,
dou hout des Ding da Teifl gseah,
dou mou nex ols da Boda her.
Is eng da Boda niat bekannt?
Nu Zahnarzt wiard a öitza gnannt.

Dou nale is ma a sua gonga,
gonz langsam hout dös fei oagfonga,
dann is da Wöiting gröißa wuarn,
hout nimma afghöiat zan buarn.
Ma Kuapf woar wöi a Bienenschwårm,
mia woar bal kolt, mir woar bal wårm.

Ma Alta wos ma Wei is sagt:
göih zan Zahnarzt — hout me packt,
und asse gsteckt za da Tür,
schöins Gotterl wöi wor den mir.

Als Kind wa dös koa Unterfonga,
dou is ma mit da Mutta gonga,
owa als Moa(n, wars doch recht blöid,
wenn ma de Alt mit höit.
Sua bin i holt mit Angst u Banga
ganz alloi zan Boda gonga.

Dea schaut me oa a gonza Wal,
u sagt moch af a mol da Mal,
ja der mou asse — wegn dian Scherm
dou wirst ma löiwa niat glei sterm,
dös werma halt mit Lachgas mochn,
mia owa war fei niat zan lochn.

Hout ma an Schlauch oa d Nosn ghängt
an Gummibolln in Händ eizwängt
u öitza pumpst owa fei fest,
bis das döi Angst a weng nou läst.

Ich ho dann pumpt dös Gas eizuagn,
ma Angst döi war a wöi vafluagn,
a suara Lachgasrausch is schöi,
dou tout oin wirkle nex möiha wöih.
Da Zoaharzt nimmt sa Zonga hea,
u ritsch dou war dös Ding scho gschea.
Dea böise Zoah, er war öitza draß,
dös war fei wirkle nea a Gschpaß.

Im Stülln ho ich ban Hoimgöih denkt
dou wa da Menschheit fei vül gschenkt,
könnt ma bei jedem Schmerz im Lebn
a sua a Portion Lachgas gebn.

Eingesandt von Otto Hofmann (aus Rabensgrün)

Woos zan Låchn

In Eghalånd fräigt a Kurgåst an åltn Moa(n der afm Bankla vor sein Häusla sitzt. „He, Sie! Ist die Burg dort restauriert?"
„Na — a Böia kröigns dortn in Wirtshaus!"

D Grooßmutter daz(ü)hlt an Enkalan bevor sie anschlåufm a Märchn: „In-ra Hüttn in Huulz drinna, håut amåål a Moa(n mit sein Wei(b uu sie(b)m Kinnern glebt. Döi wårn jå sua årm, koin Kreizer Göld hoo(b)ms ghåt ..."
A Enkel iis-ra glei ins Wort gsprunga uu fräigt: „Hoo(b)m döl eppa koa(n Kinnerbeihilfe kröigt?"

„Der Mensch iis neat normal."
„Vawaa?"
„Waal-a sua rouhri iis. A normaler Mensch waa(r scho(n varuckt wor(d)n."
Gerald Deistler