Gschpasslawela usw. niat vagessn. Fangts hålt amål ua. Schu ban Essn gits suavül Ausdrück wöi: „An Kaaln oder Kaunzn Braut, Schmackerl, Erdäppl in da Bröi." Ich ho ja an Echalanda, die Karlsboder Zeiting owa dou find ma halt unara Schlaggewala Ausdrück niat u mia woarn ja a Sprachinsel im Echaland, dös is durch die Berchleit kumma. Also sadts halt sua dickköppet u helfts ma a wing mit.

Kinnt mas fei glaubn, wenn de Richard kinnt u verlangt va mia an Beitrach zan HB, donn sitz ich manchmal vua meine Schreibmaschin aff deitsch gsagt: „Wöis Kind vuarn Dreck". Ich zabrich ma fåst an Kuapf u mia fällt ims Freckn manche Ausdruck nimma ei. Mia woarn halt amal a „Extrawuarscht" im Echaland genau wöi die Fischbröi mit ihrn „Ghoatt". Touts enkara Hiarnkastle a mit a wing uastrenga, schreibts awing wos auf u schickts mas. Owa valangts niat, daß ich aff als Antwuart schreib. Ich bin zwår Rentner, owa ös wißt ja selwa — Rentner håbm kaa Zeit —.

Wenn ma a eichens Heisl mit an Garten hout u nebenbei nuch sua onara Ehrenamtle, dazou schu üwa die 70 naus is, donn stimmts fei! Es gäiht a nimma sua wöi ma gearn wöllt. Mei Wei sagt ja ållewal, sie mou ma nuch döi Schallplattn kaffn: „Man müßte nochmal 17 sein". Suawos mou ma sich a nuch gfalln loua. Ich tröist mich hålt allewal, daß onarn a niat vül besser gäiht. In Auerbach hout ma da Hermann, a Schoolkollech gsagt: „Albin, mia wearn älta u langsam Friedhofsgemüse". Aufmunternd is dös ja grod niat, owa er hout recht. Ma kua halt die Gaua nimma zaruckdrahn u dös is fei gout sua. Es kam ja du nix Gscheits dabei raus.

Ich waas niat wos da Richard als füarn HB dösmal aff Lager hout. Mia föllt augenblicklich ni mäia ei u ich wüll a niat za spat drua sei, wal an HB zsammstelln is ja a a ganz schöina Arwat.

Ich hoff, daß ich im nächsten HB schu wos va enkern Einsendungen vuasetzn kua u wünsch enk Alln a gsegnts Weihnachten u a gsunds, surgnfreis „Neis Goua!"

Enka Albin Steinwasser, 8756 Kahl am Main, Mozartstraße 6

[obr] Gruß aus Schlaggenwald

[obr] Siegls Gasthaus in der Sackgasse (Eigentümer Schröck-Fleischer)