Wöis daham woar

Wenn mia Schlaggewåla in d Stoodt gånga san, dånn habm ma Kårlsbod gmant. Duathie(n) håut ma kinna af a poarala Wech göih oda a fahrn, je nouchdem ma Lust ghatt håut mit unarn Bahnle üwa Elbuagn, Neisootl und dånn mit de Buschtirader am üawarn Bahnhof ode(r) onarschtrüm üwa Schöi(n)wiahr u dånn durch Tüapltål am üntern Bahnhof. Mit n Roßmeisl sein Autobus va Schöi(n)feld is ma üwa Elbuagn, Hurna Berch, Maiehüöfn, Fischern. Unara Buatnweiwa san owa niat gfahrn, dös häit Geld kost. Döi san löiwa üwarn Sånd, d Haad, Tofler Berch u di Löinart nei af Kårlsbod. A mit d Fåhrradle håut ma kinna fåhrn. Durch die Zech nunta woar du a wunnaschöina Strouß. Üm jeda Krümm a onarscht Büldl u nuntawoarz haut ma brauchn fåst goua niat tretn u donn äiarscht durchn Wold üwarn Hans-Haling, dös woar du wöi in a ran Märchen. Dou möißt ma schu a Rossegger ode a Adalbert Stifter sei, da ma dös sua richtich beschreibn kannt. Owa af dean Wech is ma amål a schäins Stückl påssiert. Dös mou ich enk sua nebnbei dazühln.

Ich woar schua vaheiret u ich bi(n) mit mein Wei in a ran Sunnta Vuarmittoch a dean Wech mit'n Radle va Kårlsbod nouch Schlaggewal gfahrn. Zwischn Håns Haling u Elbuagn is a schöina Wåldwech gonga, rechts da Fouß van Hurna Berch u links die Echa. Af amål röift mei Wei: „Albin, schau schnell amal nouch links, drübm in da Echa bodn nåckede Madle". Mich houts natürlich grissn u va lauta Schaua hob ich af amål sua a drumm Föichtn in Arm. Mei Frau, dös schodenfroucha Ding, hout hellauf glacht u schwippdihupp woarn döi schöin Madle in Wåsser drinna. Döi Föichtn woar owa nuch mei Glück, sünst war ich va laute Schaue üwars Maierl mit mein Radle nuntagrumpelt.

Üwa Gfell durchs Tüapltål håut ma kinna a fåhrn. Nua haut ma möin die Gfeller Strouß naufhäschn, owa dånn durch Gfell u nunta bis za da Båhn ba da Kuhlmühl, dou håut ma brauchn fei niat tretn. Dou håut ma gouta Bremsn braucht u da Rücktriet hout manchmål graucht u glöiht. Ka Wunna, aff da Gfeller Häich woarn üwa 600 m Seehöhe u untn ba da Kuhlmühl nua 440 m. Dafüar hout a döi Stroußn „Da klane Semmering" ghaßt. Dürchs Tüapltal runta woars owa dånn die reinste Erholung. Links Zöiglhüttn mit n Schloß, dahinta da Wåld va da Haad, rechts san a die Berch in d Höich gonga u as håut niat long dauert woar ma ba da Tålsperre. Pirknhåmmer, Kaiserpark, Freundschaftsall, Posthuaf u ban Pupp hintn is ma donn nåuch Kårlsbod nei kumma.

Dou soll ma aane amål sogn, ba uns daham woars niat schöi. Suagåua an åltn Goethe houts ba uns gout gfalln, sünst war er niat sua oft nåuch Karlsbod kumma u sua vüll onara mit dazou!

Heint wolln ma owa amål va Töppeles nåuch Schlaggewål göih. Mia steign am Båhnhuaf aus, gänga schöi artich van Dietl Wirtshaus våbei u käihran niat ei. Die Kapelln loun ma links liegn u tippln schöi staad dean Berch nauf. Niat sua wöi als Boubn, dou san ma ua dean onarn vabeigwetzt u dean Berch naufgrackert, wal mia habm wolln allemål die äiarschtn sei. Heint gänga ma eppas längsämme. Es is jå schließlich ka Promenadnwech, sondern nua a staanicher van Reng ausgwåschener Steich.

Füa die heintiche Schouchmodi ware fei nix. Ställts enk amål vüa, döi lei(n)wendichn Schöichla mit dean houchn Absätzn, vua ra paar Gouarn nuch spitzich wöi d Noudlköppla u öitza is die Suln schu 5 cm dick u d Åbsätz san nuch 5 cm häicha oder gaua nuch mäia. D'Leit wolln hålt heintzatooch allewal häicha naus.

Bequemer war ja de sogenånnte Leichnwech gwest. Dea is links va da Kapelln ua da School long u schöi zügich üman Berch rümgånge. Owa dös woar ja a grouß Ümwech, dea is nua van Bauern benutzt wuard u a van Leichnwogn. Töppeles hout ja za

[