Wöis daham woar

Hoffentlich sad's alle gout ins neie Gouja neigrutscht u enkera Wünsche gänge in Erfüllung. Ba sua an Gouauafång mecht ma sich hålt ållemål Gedankn. Wos wiards bringa? Gouts u Schlechts, mia möins nemma wöis kinnt u unna Herrgott lädt uns schu niat mäija auf als ma trogn kinna. Wenn ma a månchmål denkt, es gäiht nimma weita; es gäiht fei du.

Denkts nua amål sua 25 bis 30 Gouja zaruck. Kuhlschwårz houts dou füa vüll ausgschaut u die Sunn hout du wieda gscheint. Mia Schlaggawåla san ja a zaache Schloch u wårn daham jå a niat grod aff Daunen bett. U dös woa fei gout sua. Mia håbm die Ziah zsåmmbissn u håbm uns a in de sogenånntn neija Heimat durchgesetzt. Wenn ma unarn Heimatbröif schöi vafolgt kua ma feststölln, daß sich schu vüll wieder a naia Existenz aufbaut u za ran eichene Häisla brächt håbm. A unara Gunga loun sich niat schmeißn. Sie håbm bewiesn, daß sie ihrn Mua stölln kinna. Egal, ob hinta da Werkbänk, Schreibtisch u wous nua imma is, sie san dou — döi gunga Antnsooss. U dös fraat mich fei van Herzn.

Måchts weita sua u valäignts enka Schlaggewål niat, donn kinna ma aff enk stolz sei(n). Dös hob ich ens wolln schu long amål sogn u wos ma am Herzn hout, dös soll ma sich fei a runterriadn, donn is an wieda bessa.

Öitza wüll ich owa amål za ran onarn Thema kumma. Mia håbm ja Fasching ghat. Dahåm håbm mia ja Fosnat gsagt. Vua a paar Togn war ich vua ra ra Ausläch gstondn — a Kaufhaus — es war allehånd Zeich zan Uazöja ausgstellt. Ich wår a wal gstondn, hob mia dös sua betråcht u wåhrscheinlich niats gscheitesta Gsicht dabei gmåcht. Dou stäiht aff amål a bekånnte Mouhm hinta mia u fröigt mich: „Nu, Vetta, wos schüttlst denn sua mit dein Kuapf?" Ich drah mich üm, lach sie ua u sooch:

„Löiwa Mouhm, ich stäij dou, wöi a Ochs vuarn neija Touja, ich kenn mich dou fei nimma aus. Ghäijart dös Zeich dou drinna öitza zan uazöja füa ålla Tooch oder ghäiarts für die Fosnat." Dou lacht sie u sågt: „Mia gäihts fei a sua, ma was nimma, ghäiart's fürs Bett ode aff d Strouß. Schau döi duatt ua, ma was du nimma obs a Mannl ode a Weiwl is." Dou kua ma halt nix måchn, ma mou die Zeit nemma wöi sie is.

Ows, wöi schöi wår dös daham, wenn döi åltn Garderobn als Urgroßmutters Zeiten viahraghult wua(r)dn san, döi håbm wenigstns nuch wos vüagstöllt. Unlängst war ich af sua an ångeblichn Maschkeraball, wos woa denn? A påår san rümmgrennt als Sträflinge in sua querstraftn Trikots. Niat amål a Schlamml hout ma gseah. Wou solln sie a wos hernemma? Wos niat nouch da neiestn Modi is, wiard weggschmissn u die Schrank san laar. Ba uns is hålt za da Fosnat a wing schöi g'ollwert wua(r)d u dou red ma „Von den tollen Tagen", Mia bleibm ba unarn;" Oh du löiwa Fosnat, kinnst denn du schu wieda, feern håbm ma Grüa grobm, haia grobm ma wieda. Hollolo, hollolo, hintn hängt die Fosnat no! „Dös Goua dauert ja die Fosnat long, va Löichtmaß bis Åschemittmich. Ös åltn Maschkera, heia häits fei vüll Zeit, stellt's enk a mål vüa, wöi oft's dou häits kinna maschkern renna.

Bis dea H. B. za enk kinnt, wiad wul schu die Fåstnzeit vabei sei u dou wårs ba uns daham aus mit'n rümm olwern. Öitza is Zeit sich za besinna u ua unara schöin Ousterbraich za denkn, uas Polerlweiha, una schöina Kirchn mit'n haalichn Grob un Ölberch. A us Ratschngöih u Schlüsslbüchsschöiß. Uaradln, tschegern, patscheckn, spieswerfn u rafln ho ich dou nuch kaane Kinna gseah. Wöi schöi wår dös u wår billich, Öitza kua nix taia gnouch sei u oina is an onarn neidisch.

Füa