## Die Schwåmmaballade
Seit ich in Rente bin, Ees Leit,
– u kinnt daher die Summazeit,
dåu ho i månchmal suara Gfrett,
waal mich mei Wei(b treibt ausn Bett:
Ich soll in ålla Herrgottsfröih,
wöi ånn'ra aah, in d'Schwåmma göih!

Sie häit sua gäan a Schwåmmabröih
u maant, dees Souchn mecht kaa Möih;
die frischa Wåldluft teet ma gout,
wöi hålt a Wei(b daherria(dn tout:
„Höltst di dazou u sei niat faad,
wiast säah, as Finna is a Fraad!" –

Ich tou ran W(ülln åls brava Mua,
huls ålta Gwandl, zöih mi ua,
steck ma a Stickl Bråut in d'Tåsch,
setz auf an Hout u nimm die Måsch;
an Schluck Kaffee, u der is kålt –
glei bin i furt, ich gäih in Wåld.

Dian kenn i nur sua ungefähr.
Daham wårs ånnas, lång is's her!
Ho dåmåls die Revier gout kennt,
wöi bin i gäan nåuch Schwåmma grennt:
zan Krudum hinta månche Stund,
am Hosnbusch u Muckngrund,

afd Kiefanspitz, zan Alisteich,
af Kuhling zou wår aah a Steigh!
Ob Hissaling, ob S(ülwabooch,
woos gfunna håut ma jedn Toogh.
Erfolgreich wår as Rimgeschlurp:
die Måsch wår voll u aah da Kurb. –

Ob ich heint meina Schwåmma fin(d?
Im fremma Wåld, håut dees an Sinn?
Die letzta Nåcht, dåu håuts nuch grengt,
da Newl schwaa am Baiman hängt.
U wåu i hi(ntåpp, ålles troppt.
A Specht weit hintn emsigh kloppt.

Schu håut as Dickicht mich vaschluckt.
Wer finna w(üll, der gäiht geduckt;
af Knöian rutsch i üwas Moos,
wåu san nan nua döi Schwåmma bloß?
Wenn ma hålt kaana Platzla waaß,
dånn is döi Soucharei a Kaas!

Suav(ül i schau u wöl i kröich
durchs Untaholz åls wöi a Vöich –
döi P(ülzla håltn sich bedeckt,
treibm Schåwanåck, håbm sich vasteckt.
Ich ho kaa Lust mäih, kröigh an Grant:
Wenn endlich ich woos finna kannt!

Af aamål kumm i afra Wies.
Dåu wår i schu, dees waaß i gwieß.
Ich stäih a Waal, bin gånz vawirrt,
ho ich mich gåua nuch vairrt?
Seit Stundn zistl ich schu rim,
u waal i's soot ho, käihri im.

Woos ho i gfunna in der Zeit?
Drei Buttap(ülsn, löiwe Leit!
Im Wåld is's schw(ül, am Hamwegh haaß,
as Hem(d durchneßt va lauta Schwaaß;
die Zäi(han aufknifft, d'Ferschn wund,
dazou nuch möid åls wöi a Hund.

Am Wåldrånd sitz i, tau pausian,
ho resigniat, kumm ins Sinnian.
Ich kua mich doch niat sua blamian,
mei Wei(b wiad wieda räsanian.
Bin rimzigheinat kreiz u quer –
wåu nimm i öitza Schwåmma her?

Dåu kinnt mei Nåchba Håns mia nåuch,
u der håut Schwåmma, bin ich fråuch!
An Rucksook voll, dåu låcht as Herz,
mei Launa steigt schu himmlwärts.
Die St(ül u Kåppm, ålla gsund.
Ich kaff nan o glei a påar Pfund.

Mia wea(dn dees weita exazian,
warum soll ich mich strapazian?!

Franz Pöttig

[obr] (bez popisku) (kresba hřibu / muchomůrky)

Anmerkungen
Måsch geräumige Stofftasche
Krudum Berg im Kaiserwald (835 m)
Hosenbusch usw. Namen von Waldungen
Buttap(ülsn eine Röhrlingsart

10