dem ewigen allwaltigen Gotte befehlen mussen, auch mit Glimpf geschehen lassen vnd es ein jeden in sein Veranthworttung stellen: Demnach ferner der Herren oben gemelten Furschlag gar gern vernomben haben vnd auch anders nicht dan, das si es zu Befurderung der Ehre Gottes, auch Fortpflantzung seines heiligen Worts vnd dan der christlichen Commun alhi zu Heil, Wolfarten vnd Seligkeitten gantz treulich meinen verstehen, darumben wir das den Herren vor solche christliebende vnd guthertzige Fuhrsorge auch zum vleissigsten vnd freundtlichsten Dank sagen vnd das auch in muglichen zu verschulden jederzeitten vnvergessen sein wollen. Wan aber ein solcher Man, dehro in der Lahre des wahren rheinen vnd allein seligmachenden Wort Gottes nach den prophetischen vnd apostolischen Schriften, alßo in der Augsburgischen Confeßion verfaßt, dann auch mit Haltung, Reichung vnd Austheilung der heiligen hochwürdigen Sacramenten, wi si von Christo selbst eingesetzt, richtig dorneben in den Haubtsprachen wohl fundirt, auch seines Lebens vnd Wandels nicht ergerlich vnd sunsten freundtlichen vnd friedtlibenden Gemuthes sei, dieses Orts vnd zu dehren gefehrlichen Zeit, do vmbher die Papisten, Jesuitten, Caluanisten trefflich wuetten vnd sich einczumischen vnd ihre falsche Furgeben auffzudrehen befleissigen, wohl bedurfig derhalben auch vleissiger Wache, Auffachtung vnd Fursehens höchst von nöthen: So wollen wir dehme allen nach im Namen Gottes auch gerne sehen, das ermelter Herr Magister Quendelinus Heinericus Heubelius, so es ihme geliebet, vffs ehist als muglich alhie ankommen vnd sich mit einer Predigt in vnser Kirchen hören lassen möchte. Wird er alßdan vns vnd der gantzen Commun gefallen, wi auch der getreue libe Gott zu seiner Zeit vff frommer Christen Gebethe seinen Weinberg vnd Kirche selbst bestellt, so mag dorauff sein des ewigen Gottes väterlicher Willen auch geschehen, welche nun die Herren ihme Herrn Heubelio anzufuegen wohl wissen werden; vnd sunst die Herren himitte auch den Gnaden Gottes zu Bewahrung bei langwiriger Gesundtheit vnd allen guthen Wohlfarten befehlen. Datum den 11ten Januarii Ao. 1593.

Daselbst liegt ein Zettel bei: „Den ehrwirdigen achtbarn vnd hochgelarten Herren Doctoribus Johanni Streittbergern, Superattendenten zu Chulmbach, vnd Aurelio Streittbergern, Superattendenten der Stadt Hoff, vnsern besonders gunstigen Herren vnd guthen Freunden.

**