Zum funfftzehenden (hat er) sich auch gegen den Schuelern, nachdeme ire Ingenia seindt, do mancher mehr mit guten freundtlichen glumpflichen Wortten dann mit schnellen Anfahren, Sturmen oder zornigen grimmigen Straffen ad studia zue bringen vnnd darbey zu erhalten, mit bedechtiger guter Beschaidenheit christlich vnnd sanfftmutig zu ertzeigen, also auch gegen denen, so Straffen verschulden, allein die Rutten, vnnd nicht Schlege oder Stösse, auch absque vehementia schulmeisterisch vnnd ohne andere Affectionen ainiger Rach, Abgunst oder jemandt andern zu Gefallen gebrauchen vnnd gleicher Gestaldt seinen Collegis auch anders nicht gestatten oder nachsehen.

Vnnd zum sechszehenden soll er auch sowol ein erbar Radth, wenn einig Theil in künfftig Besserung suchen, mutiren vnnd einander solch Ambt vnnd Dienst auffkundigen vnnd resigniren wollen, dasselbige ein vierttel Jahrs zuuorn vermelden, vnnd dieselbige Aufsage oder Resignation nirgendts anders wo dann vor ermeltem Radth in der Radtsstuben geschehen; der Rector auch dasselb vbrige virtel Jahr sein Ambt wie zuuorn vollendts gebuerlich versehen, vnd dagegen auch so lang biß zu Außgang desselben der Besoldung vnnd Accidentien gewerttig sein.

Dagegen soll er der Rector wöchentlichen vnnd ydertzeiten zu Besoldung, Einkommen vnnd gewerttige Accidentia oder Gebueren haben, wie volget:

1. Anderthalben Gulden behemisch oder sechs vnd dreissigk Weißgroschen Bahrgeldt soll er jede Wochen auß eines erbarn Radths vnnd gemainer Bergkstadt-Cammerey zu empfahen haben.

2. Mehr soll er auch von den järlichen Zehenden des vnausgedroschenen Getraides, so die eingepfartten Dorfschafften jährlichen herein zur Schuelen volgen lassen, den halben Theil haben, welchen er dann mit dem Cantori (dem itzigen oder andern künfftigen) mit iren aigenen gleichen Costen vff den Dörffern samblen, hereinholen vnnd verschaffen lassen mag.

3. Item von einer jeden Leich, die er der wöchlichen gebreuchlichen Ordnung nach mit den Pauperibus oder andern Schuelern zum Begrebnus belaitet, sowol auch wann er sonst ausser der Ordnung mit pro funere zu gehen von des Verstorbenen Eltern oder Freundtschafften begert wirdt, geburt ime allwegen zwen Weißgroschen vnd keines mahls mehrers; es wollen dann die Leutte figural singen lassen, so sollen dieselben sich auch vmb ein leidliche Gebur mit ime vnnd den andern Schueldienern sembtlich zu uorgleichen schuldig sein.

Item wann er neben dem Supremo vnd Cantori in Martini Festo mit den Pauperibus in der Stadt von Hausse zu Hauß vmb-