allen zugleich oder doch den Minoribus vnnd denen, so die Kirche nicht besuchen können, an Sontagen zu predigen keiner Zeit nachgelassen, sondern damit fortgefahren vnnd zu jedern kunfftigen Zeiten nicht eingestelt werden, also auch er seine Collegen treulich darzu anhalten soll, solches Alles mit mehrern besagt.

Zum neundten soll auch der Ludi Rector ohne Erlaubnus des Herrn Pfarherrs sowol auch des regierenden Burgermeisters zu keiner Zeit außraisen noch vber Nacht von der Schuelen aussenbleiben.

Zum zehendten soll er auch vff das Feuerhalten und Leutten treuliche fleissige Achtung geben, damit durch sein Gesindt vnnd furnemblichen auch nicht durch die Schuelknaben Schaden geschehen möge, darumben auch inen den Pauperibus ainige Liecht in die Cammern zu tragen nicht verstatten.

Zum eilfften soll er auch Acht haben, das von den Betthen vnnd Leinengeredten, so den Pauperibus vff die Schuelen gegeben (daruber ime dann ein sonderliches Inuentarium zugestelt) nichts veruntreuet noch vermindert werden möge, vnd dieselben Bette vnnd Geretthe alle Monatszeitten durch sein Gesinde, wofern er ehrlich sein vnd dessen haben wirdt, waschen und rainigen lassen.

Zum zwölfften soll er die Pauperes jederzeitten auch dahin anhalten helffen, wann der Kirchner zum Leutten der Glocken oder Sauberung der Kirchen irer bedarff, das sy sich darzu unseumblich vnnd ohne alle Waigerung willig ertzeigen vnnd dasselbig modeste ohne Geschrey oder anderweit vncziemblich (Rede) verrichten.

Zum dreytzehenden: Wann auch nach dem Willen vnnd Schickung des allmechtigen Gottes geschwinde vnnd gefehrliche Seuchen, Kranckheitten vnd Sterbensleuffte, Pestis oder anderst alhie in dieser Bergkstadt einfallen möchten, soll auch er der Ludi Rector sowol, alß auch wie die andern seine Collegen thun vnnd praestiren sollen, alda in und bey der Schuelen bleiben, sein Ambt wie vorhin verrichten vnnd sonderlich mit seinen Collegen, deren jederzeitten Ordnung nach wechselsweise eine Woche vmb die andere die Funera mit den Pauperibus oder andern Schuelern sowol auch sonsten, wenn vnd so offt es begert wirdt, zu den Begrebnussen zu belaiten vnd mitzugehen schuldig sein.

Zum viertzehenden soll er auch ein Buch vber alle abgestorbene Personen, inn- vnnd außlendisch, so alhier begraben werden, halten, derselben Namen, es sey jung oder alt, arm oder reich, vmb kunfftiger Nachrichtung willen mit allem Fleiß darein vertzeichnen vnnd auffmercken.