Zum funfften soll er auch vff die Schuler vnnd Mendicanten, so uff der Schuelen jederzeit wohnen vnnd ire Nachtleger daselbst haben, bey Tag vnd Nacht fleissige Achtung geben, damit sy eines erbarn Radths vnnd dann auch der Burgerschafft milde Gaben mit Bethen, Dancksagen auch zuchtiger Ehrerbittung, fleissigem Studieren, vnnd nicht zum Verpartieren, Verwechseln oder sonsten schendlichen Verderben vnnd ergerlichen Vmbbringen erlangen, einnehmen, empfahen noch geniessen, furnemtlich auch inen kein vngebuerliches Außlauffen, Zechen noch Spielen bey Tag vnnd Nacht verstatten, sondern darfur in mussigen Zeitten sy zum Musiciren oder Repetirung irer Lectionen ernstlich anhalten: Darumben inen dann alle vnnd jede Pfenninge vnnd Gelder, so sy am Mittwoch vnnd Sonnabendt, item an hochzeitlichen Wirdtschafften, item sonst in den conuiuiis, dahin sy kommen oder gefordert werden, vnnd sonderlichen auch zu Weinachten vnnd am neuen Jahrszeitten zugleich einzusamblen, vnnd alleine vnter sy zu Erkauffung der Pucher, Papjir, Dintten, Schuch vnnd andern Leibes- vnnd Studirens-Noturfften außzuthailen (inmassen er der Ludi Rector mit Radth des Herrn Pfarherrs solches auch richtiger weise auszuordnen) gelassen werden sollen.

Zum sechsten soll er dieselben pauperes, so vff der Schuelen wohnen, noch auch andere Schuelknaben einigerley weise Potschafft lauffen oder arbeitten, noch sonsten zue andern Mitteln, dardurch sy von der Schuelen vnnd Kirchen absentirn vnnd die Predigten oder ire Lectiones verseumen musten, nicht gebrauchen, noch auch von den andern zu geschehen verstatten, sondern sy teglichen gewerttig zu sein verbleiben lassen; doch ausserhalb der Erndtzeit, do er Rector von einem oder andern Burger vmb ettliche Knaben, zum Auffsamblen inen hulfflich beyzuspringen angesprochen vnd ersucht wirdt, sich nach Gelegenheit gegen inen beförderlich zu erweisen wirdt wissen.

Zum siebenden soll auch der Ludi Rector weder in nundinis noch diebus canicularibus oder andern Zeitten ohne Consens vnnd Einwilligung des Herrn Pfarherrs den Schuelknaben vff gantze oder halbe Tage Remissiones a studiis nicht erlauben.

Zum achten soll auch der Ludi Rector jederzeitten die Schuelknaben souiel möglich vnd sonderlich Winterzeitten diejenigen, so Kelte halben auswarten können, alles fleiß in der Kirchen zu den Predigten halten, inmassen dann auch die Ordnung, das er vnnd sowol die andern seine Collegen wöchentlichen vmbwechseln, vnnd einer nach dem andern in der Schuelen den Schuelern entweder